PROVINCIAE foederatae Belgii

PROVINCIAE foederatae Belgii

seu Belgium unitum, et Batavum, les Provinces unies du Pays Bas, seu les Estats de Holande, sunt provinciae Boreales Belgii, quae alias suberant dominio Regis Hispaniae, eique obvenerant ex hereditate Caroli ultimi Ducis Burgundiae. Sed dum severius animadvertit Philippus II. eas ad defectionem impulit, quâ, institutô Dordraci Ordinum conventu, Regem hispaniae Principem suum eiuravêre die 26. Iulii, A. C. 1581. et se in libertatem vindicârunt, unde enata bella, quae tandem sopita sunt pace monasteriensi A. C. 1648. Is his septem sunt provinciae, nempe Holandia, la Holande, Zelandia, la Zelande, Gueldria pro maiori parte cum Zutphaniae Comitatu, la basse Gueldre et le Comte de Zutphen, Frisia occidentalis, l'Owest Frise; seu la Frise, Trans-Isalania, l'Ouver Issel, Ultraiecti Dominium, la Seigneurie d'Utrecht, et Dominium Groningense, la Seigneurie de Groningue. Comitia Statuum Hagae Comitis celebrantur. Sed Amsterodamum urbs est totius regionis amplissima. Provinciarum foederatarum Belgii dominio subsunt etiam aliquot loca Ducatus Limburgici, Rhenoberga in ditione Coloniensi, Vesalia, Orsoia, Reesia, Genapum, et Emericum,

in Ducatu Clivensi, Embda et Liberotia, in Frisia orientali, Traiectum ad Mosam, in ditione Leodiensi, Silva Ducis, Breda, Bergae ad Zomam, Lilloa, Stenoberga, et Villelmostadium, in parte Boreali Brabantiae, uti etiam Clausulae, Axela, hulstum, Agger Gandavensis, Isendicum, et Cassanda, in parte septentrionali Flandriae. Vide supra in voce Belgae. Hae Provinciae unitae Belgii habent etiam, in Africa arcem S. Georgii de Mina, Caput Corsum, et aliquot loca in ora Guineae regionis et Nigritarum. In America habent novum Belgium, uti insulas Curasoam, novam Valachriam, Sabam, S. Eustachii, et alias ex antillis. In Asia autem eis subsunt Batavia urbs recens in Iava insula, Malacca in India extra Gangem, Moluccae insulae in mari Indico pro maiori parte, Amboina et Banda insulae, uti et aliquot aliae in illis partibus, plurimae arces in ora occidentali sinus Gangetici, Columbum, Gala, Iafanapatanum, in Taprobana insula, et aliquot portus, uti etiam Cocinum, Cananora, et Cranganora, in ora occidentali Indiae intra Gangem.